ភ្នំពេញ៖ ក្រុមប្រឹក្សាជាតិគាំពារសង្គម បានចេញសេចក្តីជូនដំណឹងដល់គ្រួសារងាយរងហានិភ័យដែលត្រូវបាន កំណត់អត្តសញ្ញាណរួច ទៅបើកប្រាក់ឧបត្ថម្ភ លើកទី៣ ក្រោមកម្មវិធីឧបត្ថម្ភសាច់ប្រាក់ ជូនគ្រួសារងាយរងហានិភ័យ ក្នុងអំឡុងពេលមានសម្ពាធអតិផរណា របស់រាជរដ្ឋាភិបាល។

អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាអគ្គលេខាធិការក្រុមប្រឹក្សាជាតិគាំពារសង្គម លោក ចន ណារិទ្ធ បានឱ្យដឹងថា គ្រួសារងាយរងហានិភ័យដែលត្រូវបាន កំណត់អត្តសញ្ញាណរួច អាចទៅបើកប្រាក់ឧបត្ថម្ភលើកទី៣ បាននៅតាមគ្រប់បញ្ចវីង ចាប់ពីថ្ងៃទី១០ ខែកក្កដា ឆ្នាំ២០២៣។

លោកបានឱ្យដឹងទៀតថា កម្មវិធីជំនួយសង្គមមួយគ្រាសម្រាប់គ្រោះអាសន្ននេះ ត្រូវបានរាជរដ្ឋាភិបាលប្រកាសដាក់ឱ្យអនុវត្ត និងធ្វើការបើកផ្ដល់ចំនួន ៣លើក ដោយបានគ្របដណ្ដប់លើគ្រួសារគោលដៅចំនួនប្រមាណជាង ៥០ម៉ឺនគ្រួសារ ឬមានសមាជិកចំនួន ១ ៨៣៣ ៣៤៤នាក់ ដោយចំណាយថវិកាសរុបចំនួនជាង ៤០លានដុល្លារ។

គួរឱ្យដឹងដែរថា កម្មវិធីឧបត្តម្ភសាច់ប្រាក់ជូនគ្រួសារងាយរងហានិភ័យ ក្នុងអំឡុងពេលមានសម្ពាធ អតិផរណា ដែលជាកម្មវិធីជំនួយសង្គមមួយគ្រាសម្រាប់គ្រោះអាសន្ន ត្រូវបានរាជរដ្ឋាភិបាល ប្រកាសដាក់ឱ្យអនុវត្ត និងធ្វើការបើកផ្ដល់ចំនួន ៣លើក ដោយលើកទី១ នៅថ្ងៃទី១០ ខែធ្នូ ឆ្នាំ២០២២ លើកទី២ នៅថ្ងៃទី១០ ខែមេសា ឆ្នាំ២០២៣ និងលើកទី៣ ចាប់ពី ថ្ងៃទី១០ ខែកក្កដា ឆ្នាំ២០២៣ ខាងមុខនេះ៕